‘ऐना झ्यालको पुतली’, बसन्त र सुजित बिडारी

काठमाडाैं :​ बुसान इन्टरनेसनल फिल्म फेस्टिभलमा ‘ऐना झ्यालको पुतली’ स्क्रिनिङ भइसकेपछि आयोजक समितिका एक सदस्यले सुजित बिडारीलाई म्यासेज गर्दै भने, ‘फिल्म सकिएपछि एक जना महिलाले तिम्रो बारेमा सोध्दै थिइन्। भन्दै थिइन्, त्यो नेपालको मान्छेले मेरो कथा कसरी थाहा पायो? मेरै कथामा कसरी फिल्म बनायो?’

आफ्नै कथामा फिल्म बनाऊँ न त भनेर ‘ऐना झ्यालको पुतली’ बनाएका बिडारी पनि ‘हजारौँ किलोमिटर पर, अर्कै देशकी अर्कै भाषा बोल्ने महिलाले कसरी आफ्नो कथा भनिरहेकी छन्?’ भन्ने सोचमा परे। आफूले बनाएको फिल्म प्रतिष्ठित अन्तर्राष्ट्रिय फिल्म फेस्टिभलमा प्रदर्शन हुनु, सिर्जनाको प्रशंसा हुनु खुशी हुने कारणहरू थिए। साथै फिल्ममा आफ्नो मात्रै नभएर धेरैको कथा समेटिएको रहेछ भन्ने कुराले पनि उनमा अचम्मको उर्जा थप्यो।